امتى تعرف انك ماشى فى شارع من شوارع مصر ؟؟؟؟

1- لما تلاقى عربيتين ميكروباص واقفين فى نص الطريق علشان يفكوا فلوس من بعض

2- لما تلاقى الأشارة حمرا والعربيات ماشية واشارجى المرور محتاس من كتر ما هو مش عارف يكتب نمر العربيات المخالفة

3- لما تقف تسأل حد على عنوان وتلاقى 3 او 4 جاوبوك وكل واحد وصفلك وصفة غير التانية

4- لما تلاقى خناقة كبيرة فى الشارع والكل بيحاول يفك الخناقة ولما تسأل هو ايه الموضوع تلاقى مفيش حد عارف حاجة

5- لما تكون راكب عربيتك الملاكى وتقف فى اشارة مرور تلاقى كل الناس اللى فى الميكروباص اللى جنبك بيبصولك فى وقت واحد

6- لما تلاقى شارع عليه علامة ممنوع الدخول وكل العربيات داخلة فيه

7- لما تلاقى واحدة نازلة من التاكسى وسواق التاكسى عمال يزعقلها وساعات يشتمها علشان عاوز اجرة اكتر من اللى اديتهاله

8- لما تلاقى الرصيف المخصص للمشاه مفروش بترابيزات وكراسى الكافتيريات

9- لما تلاقى المرور ماشى ببطأ وفى الأخر يتضح ان عربية كارو بحمار هى اللى معطلة الطريق

10- لما تلاقى علامة ممنوع الوقوف وتلاقى العربيات راكنه صف اول وكمان تانى

11- لما تلاقى عربية كسرت اشارة المرور ولما تبص عليها تلاقى على الأزاز بادج النسر والأزاز معمول فيميه

12- لماتلاقى عسكرى المرور بيحاول يمنع عربية من الدخول فى الطريق العكسى وتلاقى صاحب العربية بيقوله انت مش عارف انت بتكلم مين

13- لما تلاقى حالة فوضى ولخبطة جامدة اوى فى الشارع وتكتشف فى الأخر ان الأزالة بتلم البياعين اللى فارشين ع الرصيف

14- لما تلاقى عربية واقفة ومضيقة الشارع والعربيات بتعدى بالعافية ولما توصل عندها تكتشف السبب ان الونش كلبش العربية ومش ممكن تتحرك ... يعنى لو كان سابها احسن كان ممكن يحركوها

15- لما تكون قاعد فى عربيتك مستنى الأشارة تفتح وتلاقى تلاتة او اربعة طلعوا عليك فجأة ... تشترى ليمون.. طيب مناديل ... طيب اى حاجة باة لله